聘請印傭費用上昇 印傭「零收費」將嚴格執行?
印尼勞工中介公會早前派出代表來港同本地外傭中介公司業界見面（８月３日），目的係交代有關印尼藉海外家庭傭工「零收費」政策，即係將聘用印傭所需的招聘費用等轉嫁至外傭僱主的有關安排。聘用印傭成本立即大幅上昇，究竟咩係「零收費」政策，聘請印傭要貴幾多，又有咩其他選擇呢? 亦附上印度政府最新回應。
甚麼是「零收費」政策?
其實喺2021年印尼政府已經頒布的「免除輸出勞工就業服務費用」，新規例下印尼政府將會負責部份原本由外傭本人支付的培訓及驗身等費用，而申請文件及護照等費用等其他費用則由僱主支付，目的係為咗印傭可「零收費」到海外工作。今次公會代表來港就係為咗切實執行依個政策。
對香港僱主的影響
現時香港僱主要負責外傭的驗身費、保險、來回機票、及前往機場的交通費。而「零收費」政策下，即係連印傭招聘費等一切費用，都係由香港僱主負責。香港僱傭公會主席陳東風指聘請印傭的費用即上昇至大約2萬港幣，即係比之前多咗4千至5千港幣左右。同時如果考慮聘請已經係香港嘅印傭，由於慳咗部份費用，印傭工資要求可能會比較進取。
市場反應及其他國家情況
其實早在2021年印尼政府宣布此規例時，有小部份本地外傭中介公司已經調整收費，今次係希望所有中介公司及僱主都可以確實執行依個規例。以筆者觀察，成本上昇香港僱主普遍都係反對，當中亦有指：「如果加價就需要提高返服務質素」等意見。根據報導，台灣政府係透過增加印傭最低工資與印尼政府談判，而令到此計劃在台灣被排除。而新加坡則成功對此政策要求「暫緩」。
聘請其他國家外傭的選擇
由於聘請印傭收費上昇，討論區有唔少僱主都表示會考慮其他國家的外傭又或是考慮Direct Hire慳返中介公司的費用。喺香港，除咗最主要的菲傭及印傭，其實仲有其他選擇，包括來自泰國、柬埔寨、斯里蘭卡、肯雅的傭工，最近更新興孟加拉傭工，甚至有傳言輸入內地傭工。
孟傭主要都係同印傭一樣係信奉伊斯蘭教，即係唔食豬肉，亦需要齋戒。不過孟傭對工作環境要求較低，亦較易接受厭惡性工作，最重要係孟傭護照會由領事館保存，所以可以減低孟傭同財務公司亂借錢嘅問題。不過孟傭學歷一般比較低，可能連英文都未必講得好。
相關閱讀：菲傭及印傭之外 香港外傭的種類
印尼政府最新回應
當初傳媒都以為印尼勞工中介公會係由印尼政府特登派人黎香港發布有關訊息，所以事在必行，後來一星期段（８月１０日），喺勞工及福利局局長孫玉菡同印尼政府代表會面之後，署理總領事表示印尼人力仲介公會立場並不代表印尼政府，並指出現時政策及規範維持不變，一掃大家的疑慮。但係幫襯外傭中介果時，記得要Check清楚報價單及合約等等文件，有無被多收相關費用喇！
相關產品:
加洲保險最新家傭保險計劃，全港最高保障額，高達$88,000港幣住院及手術費用保障；更特設家傭試用保障及預留保障365日, 了解更多或立即申請
本文章中提供的信息僅供一般參考，不作為任何形式的建議。 本公司對其使用不承擔任何性質的責任。
來源:
